Wednesday, May 27, 2015

கண்டுபிடிங்க‌....இது எந்த ஊர்?? :-)

"ஹைய்யய்யோ விடிஞ்சிருச்சே..எப்படி இவ்ளோ நேரம் தூங்கினோம்னு"  'தடக்'ன்னு தூக்கி வாரி போட்டு விழித்து, பல்துலக்கி,  நேரம் பார்த்தால் காலை நாலரை.  நான்கரைக்கே, விடிந்து நமது எட்டு மணி போல் பிரகாசிக்கும் ஊர் அது...

பார்த்துக்கொண்டிருக்கும்போதே,  சின்னஞ்சிறு  மேகத்திட்டு, ஒன்று, கொஞ்சம் கொஞ்சமாக வளர்ந்து நம்மை மூடிக்கொள்ளும். மேகங்கள் நாள்முழுக்க நம்மோடு கண்ணாமூச்சி விளையாடும்   ஊர் அது...

எதிர்பாராத நேரத்தில், கருமேகம் ஒன்று, முழுசாக‌ நம்மை நனைத்துவிட, மழை அடுத்த சில நிமிடங்களில் பெய்த தடயமே இல்லாமல் சூரியன் புதிதாக முளைக்கும், கதவருகில் ஒளிந்துநின்று செல்லமாய் பயமுறுத்தும் குழந்தையைப்போல்...

சிறு சிட்டுக்குருவிகளென பறந்து திரியும் அதிசய பட்டாம்பூச்சிகளின் சொந்த ஊர் அது... 

தாகமெடுத்தால் தண்ணீரல்ல, 'ரெட் டீ'தான் பருக...தேசிய பானமே அதுதான்!

பசித்த போதெல்லாம் நாங்கள் புசித்தது, விதவிதமான‌ 'ஃப்ரைடு ரைஸ்' மற்றும்  'ஹக்கா சௌ'. அந்த ஊரின் ஸ்பெஷல் உணவே 'மாமிசமும்' 'வெற்றிலையும் பச்சைபாக்கும்'தான்!

'பள்ளிக்குச் சென்று ஆங்கில வழியில் கற்றால்தான் தங்கு தடையின்றி ஆங்கிலம் பேசமுடியும்' என்ற கற்பிதத்தின் முகத்திலறையும் ஊர்....... பள்ளிக்கூடம் போகாவிட்டாலும், சரளமாக ஆங்கிலத்தில் உரையாடும் கிராம மக்கள் நிறைந்த ஊர் அது...

நதிகளை, பொங்கி பிரவாகிக்கும் காட்டாறுகளை தாண்டிச்செல்ல மக்கள் பயன்படுத்துவது, நம்மைப்போல் காங்கிரீட் பாலங்களை அல்ல... இருகரைகளிலுள்ள‌, மரங்களின் பின்னி பிணைத்த  வேர்களே கரைகளை பிணைக்கும் பாலங்கள்!

கிரிக்கெட்டோ டென்னிசோ அல்ல, அந்த ஊரின் விளையாட்டுகள்  அம்பு விடுதலும், மீன் பிடித்தலுமே. குளங்களில், கூட்டம் கூட்டமாக அவரவர் மீன்பிடி கோலுடன், அமர்ந்து, பொறுமையாக காத்துக் கொண்டிருப்பதை காணலாம். அம்பு எறிதலுக்கோ, டிக்கெட் கவுண்டர்கள் ஆங்காங்கே முளைத்திருக்கும்.

'அப்பா காசை எண்ண முடியாது; அம்மா புடவையை மடிக்க முடியாது' என்ற புதிர் கேள்விப்பட்டிருப்போம். 'அருவிகளை எண்ண முடியாத ஊர் எது' என்ற புதிய புதிரையே இந்த ஊருக்காக‌ உருவாக்கலாம்.

முக்கியமாக, ஊர் பெயர்களெல்லாம் எங்கள் வாயிலேயே நுழையவில்லை. 'நோங்வார்' 'மாஸின்ட்ரொம்' ' மாஃபாலாங்' ' மாவலாய்' 'மாஸ்மாய்' 'லாட்டின்ஸ்க்யூ' 'உம்வார்' இவைதான் எங்களுக்கு எளிதாக இருந்தவை.

புடவை எட்டாத ஊர் இது. சுடிதார்,இந்த ஊரில் எடுபடவே இல்லை. அலுவலகத்தில் வேலை செய்பவரோ, வீட்டில் வேலை செய்பவரோ...ஏன், திருமண வரவேற்பு கொண்டாட்டமோ...பெண்கள் அனைவரும் உடுத்துவது இரு துண்டுகள் கொண்ட‌ 'ஜெயின்சம்'!

கண்டுபிடிங்க‌....நாங்க எந்த ஊர் போயிட்டு வந்திருக்கோம்னு?  :-)

6 comments:

Anonymous said...

Shillong ....

Ponchandar said...

”மேகாலயா” தானே

Jaikumar said...

Sirapunji

Angelin said...

Cherrapunji,meghalaya
living root bridges இருப்பதால் மேகாலயா தான்

puduvai siva said...

கண்டுபிடிங்க‌....நாங்க எந்த ஊர் போயிட்டு வந்திருக்கோம்னு? :-)

Labels: ச்சிரபுஞ்சி, பயணங்கள், மேகாலயா, ஷில்லாங்

or

எட்டுகால் பூச்சிக்கு எத்தனை கால்??? :-))))

Anonymous said...

Meghalaya